၁၃ရ၄ တော်သလင်းလကွယ်နေ့ (ဥပုသ်နေ့)
ရန်ကုန်မြို့
သမိုင်း အောင်ဓမ္မရိပ်သာ
နာယကဆရာတော် အရှင်တေဇနိယ ရေးသားသော
မင်္ဂလာကြယ်စင်တွေ လင်းလက်စေဘို့
(၇) ဗာဟုဿစ္စ မင်္ဂလာ
ကြားမြင်များလေ လိမ်ညာတွေ မသွေကင်းဝေးမှာ
လောကီလောကုတ် အကြားအမြင်များတာ ဗာဟုဿစ္စ မင်္ဂလာပဲ ။အကြားများအောင် ဆရာ ဆရာမတွေအနေနဲ့ ဘုရားဟောကြားတဲ့ ၀တ္ထုသာဓကတွေထဲက သင့်လျော်တဲ့ ၀တ္ထုကိုရွေးချယ်ပြီး ကျောင်းသူကျောင်းသားတွေကို ဆုံးမရမယ်။
အမြင်များအောင် လောကီအတန်းပညာတွေ သင်ကြားပေးရမယ်။
တပည့်တွေ အနေနဲ့လည်း ကိုယ်ကိုယ်တိုင် ဓမ္မစာပေတွေ ဖတ်ရမယ်။ အတန်းပညာလည်း ကြိုးစားသင်ကြားရမယ်။ ဒါမှသာ အလိမ်အညာ မခံရမှာ။
"ဘာမှန်း မသိတော့ ၊ ညာမှန်းမသိဘူး " ဆိုတဲ့ ဆိုရိုးစကားတစ်ခုရှိတယ်။ တချို့ ဘိုးတော်၊ မယ်တော်၊ နတ်ကတော် တွေ လိမ်နေတာရှိတယ် ။ ဗေဒင်ဆရာ ဓါတ်ဆရာတွေ ဘာသာရေး ယောင်ဝါးခေါင်းဆောင်တွေ လိမ်နေတာလည်းရှိတာပဲ။
လူသားတိုင်း လောဘ ဦးစီးနေကြတာ ဆိုတော့ ကြီးပွားချင်ကြ ၊ ချမ်းသာချင်ကြတယ်။ မိမိ မှာ အကြားအမြင်နည်းတော့ သူတို့ပြောတာ ယုံကြည်ကြတယ်။
နတ်ပွဲ က ရင် ကြီးပွားမယ် ဆိုတော့ ကကြတာပဲ။ ဒီဖယောင်းတိုင်ထွန်း ကြီးပွားမယ်ပြော ထွန်းကြတာပဲ ။ ဒီယတြာချေရင် ကြီးပွားမယ်ပြော ချေကြတာပဲ ။ ဒီအဆောင်လေး ဆောင်ထားရင် ကြီးပွားမယ်ပြော ဆောင်ကြတာပဲ။
အမှန်တရား မသိတဲ့ ၊ အသိဥာဏ် ကင်းမဲ့သူတွေက သူတို့ခိုင်းသမျှ လုပ်ကြတယ်။ လက်တွေ့ကြီးပွားသွားတာက သူတို့ပဲ ကိုယ်မဟုတ်ဘူး။
တချို့သော ဘာသာရေး ခေါင်းဆောင်တွေက ဘုရားဟောတရား ပယ်ရှားပြီး ဒီဘုရားကို ကိုးကွယ်ကြ ၊ ဒီဘုရားကိုးကွယ်ရင် ရာထူးတက်မယ် စီးပွားတက်မယ် လို့ ပြောဆိုစည်းရုံး လိမ်ညာနေကြတယ်။ ကြီးပွားချင် ချမ်းသာချင်တဲ့ လောဘဦးစီးလေ ဒီလူကို လိမ်လို့ကောင်းလေပဲ။
ယခုအခါမှာ ငယ်ရွယ်သူတွေကို ပညာရေး အောင်မြင်အောင်လုပ်ပေးမယ်လို့ ပြောဆို စည်းရုံးလိမ်ညာရင် လွယ်ကူတယ် ။ လူလတ်ပိုင်းတွေကို စီးပွားတက်အောင် ရာထူးတိုးအောင် လုပ်ပေးမယ်လို့ ပြောဆိုစည်းရုံး လိမ်ညာရင် လွယ်ကူတယ် ။ လူကြီးပိုင်းတွေကို မဂ်ဖိုလ် တကယ်မရရှိဘဲနဲ့ ဒီတရားကို အားထုတ်ရင် မဂ်ဖိုလ်ရမယ် ။ သောတာပန်ဖြစ်မယ်ဆိုပြီး ဘာသာရေးကျင့်စဉ် တွေနဲ့ လိမ်ညာရင်လည်း လွယ်ကူတယ် လို့ ရှေးဆရာတော်ကြီးများက ဆိုထားတယ် ။
"လိမ်ညာသူကို လူမိုက် ၊ အလိမ်ခံရသူကို လူအ" လို့ပညာရှင်များက ဆိုထားတယ်။ မိုက်တဲ့သူက လိမ်ကြတယ် ။ အ တဲ့သူက အလိမ်ခံရတယ် ။
သာသနာ နဲ့ ကြုံတုန်းမှာ မှ အမှားနဲ့ အမှန်ကို ခွဲခြားသိမြင်သူ မဖြစ်သေးရင် မြင်တာ ကြားတာတွေကို ဖြစ်နိုင်မဖြစ်နိုင် တွေးတောဆင်ခြင်ဆုံးဖြတ်နိုင်တဲ့ ဥာဏ်ကို မရသေးရင် ဒီပုဂ္ဂိုလ်အတွက် အမှားသံသရာက လွတ်ဖို့ မလွယ်တော့ဘူး။
ဘုရားဟောစကား မယုံကြည်ဘဲ အများပြောစကား ယုံကြည် နေကြရင် ရွှေပြည်နဲ့လဲ ဝေးမြဲဝေးဦးမှာပါ ။ ယနေ့ က စ အလိမ်အညာ မခံရဖို့ရာ လောကီလောကုတ် အကြားအမြင်များအောင် ကြိုးစားသင်ယူ ဖတ်ကြားမှတ်သားကျင့်ကြံကြပါလေ ။
No comments:
Post a Comment