[X] Choose Font Here

Thursday, July 25, 2013

၂ နှစ် လေးလ မဟေမာ

ဒီလ ၁၈ မှာ  နှစ် နှစ်လေးလ ပြည့်ပြီးသွားတဲ့  မဟေမာအကြောင်းကတော့ ပြောမဆုံးပေါင် တောသုံးထောင်ပါပဲ ။

ဘယ်ကစပြောရမှန်းမသိလို့ ရန်ကုန်က မောင်လေးတစ်ယောက်ကပို့ပေးလာတဲ့ ဓါတ်ပုံလေးကနေ စပြောမယ် ။














               သမီးလေးရေ ဒီပုံလေးကိုကြည့်ပါဦး ဆိုပြီး သူ့ပုံလေးကို လက်ညှိုးထိုးပြီး ဒါဘယ်သူလေးလဲ ဆိုတော့ လိပ်ပြာလေးလေ မေမေရဲ့ တဲ့ ။ မအေ က မီးမီးပုံ လို့ ဖြေမယ်ထင်နေတာ ။


ဟေမာ့ ဖိုးဖိုး ပြန်သွားတော့ ဒီမှာ သူ့အဖိုးနဲ့ စားအတူ ကစားအတူတူ နေခဲ့တာဆိုတော့ သူ့အဖိုးကိုများ လွမ်းနေ သတိရနေမလားလို့ စိတ်ပူမိသေးတယ် ။ ကလေးဆိုတာ စွဲမိ စွဲရာမဟုတ်လား ။ သူကတော့ ဖိုးဖိုး ရန်ကုန်ပြန်သွားပြီ ဆိုပြီး ပြောနေတာကလွဲလို့ အေးအေးဆေးဆေးပါပဲ ။
အမယ် တနင်္ဂနွေတွေ သူ့အဖိုးဆီ ဖုန်းဆက်တော့ အဟုတ်ကြီး ...ဖိုးဖိုး ဘာစားလဲ မေးသေးတာ ။ သူ့အဖိုးက မုန့်ဟင်းခါး စားတယ် မီးမီးလေးရော စားမလားဆို ဟုတ်ကဲ့ ဟုတ်ကဲ့ နဲ့ ဖုန်းပြောတာက ဖြောင့်လို့ ။ လာ ဟေမာ ဖွားဖွား နဲ့ ပြောလိုက်ဦးဆိုရင် တခါတလေ ခေါင်း က ယမ်းသေးတာ ...။


            

ဒီအနွေးထည်လေးပေါ့ သူ သိပ်ကြိုက်တယ်


  ဖေဖေ ရော မေမေပါ သူ့ကိုသိပ်ချစ်ကြမှန်းသိတော့ သိပ်ကိုဗိုလ်ကျတယ် ။ ပြန်လဲပြောတတ်နေပြီရယ် ...
သူ့အဖေ ၀ယ်လာပေးတဲ့ အနွေးထည်လေးကို ကြိုက်လွန်းလို့ မချွတ်ပဲဝတ်ထားတာ ။
ချွတ်ခိုင်းလို့လဲမရ ။
ခန နေတော့ သူ ဘွတ်ဘွတ်ပါတယ်ဆိုလို့ ရေချိုးခန်းထဲခေါ်သွားတော့
သူ့အဖေက အနွေးထည်လေးချွတ်ထားခဲ့ပါလား သမီးရယ် ရေစိုလိမ့်မယ် ဆိုတော့
                 အင်္ကျီကို မ ထားမှာပေါ့ ဖေဖေရဲ့ တဲ့ ချက်ချင်းပြန်ပြောတတ်တယ် ။












                သမီးလေး က မေမေ့ကို သိပ်ချစ်တော့ တခြားကလေးတွေကို ချီတာ မြှူတာ မကြိုက်ဘူး ။ မေမေ မချီနဲ့ မီးမီး ကိုပဲ ချီပါ လို့ ပြောသေးတာ ။
သူ့ အဖေ တောင် မအေနားကပ်တာ မကြိုက်ဘူးရယ် ။


              Giant မှာ ဈေးဝယ်သွားမယ်ဆို ဟေမာ တို့ ရှေ့ဆုံးကထွက်တယ် ။ အမယ် မအေ ကို သတိပေးသေးတာ မေမေ အကြွေနုတ်ပါလား တဲ့ ။ အပြန်ကျရင် အကြွေစေ့ထည့်တဲ့ စက်ကနေ မုန့်ထုတ်ဝယ်ခိုင်းမယ်လေ ။
သူ အပြင်အရမ်းထွက်ချင်နေပြီး မအေ က မထွက်နိုင်ရင် ဖိနပ်စင်က ဖိနပ်ထုတ်ပေးရတာနဲ့ ဓါတ်လှေခါးကို သွားနှိပ်ထားပေးတာနဲ့ ပျာနေတာ ။



မေမေ့ ကို ဘယ်လောက်ချစ်ချစ် အပြင်ထွက်ရင် ဖေဖေ နဲ့သာထိုင်ချင်တာပါတဲ့ ။ ကြည့်ဦး သူ့အဖေ ရုပ်ကြီးကို ပီတိတွေဖြာနေတာ







သူ ကာတွန်းကားလေး ကြည့်ချင်နေလို့ အပြင်မထွက်ချင်ဘူးဆို  မေမေ ချီပါ ၊ မေမေ ချီပါ  နဲ့ ဂျီတိုက်ရော ။ သူ့ ကိုယ်လုံးလေး က ၁၆ခွဲ ကေဂျီတောင် ရှိနေပေါ့ဟာကို ဒီမအေ ဘယ်တောက်လျှောက်ချီနိုင်ပါ့မလဲတော် ။


         



အိစ်ကုတ်မှာ ဒီလိုသဲတွေနဲ့ ပေလူးပြီးဆော့ရတာ ကြိုက်တယ်လေ









ပိတ်ရက်တွေဆို နေ့လည်နေ့ခင်း သူ့အဖေ အိပ်ယာက နိုးလာရင် ဖေဖေ အိစ်ကုတ်သွားမယ်နော် နော် နဲ့ ပူဆာသေးတာ ။ အခြေအနေ နဲ့ အချိန်အခါကြည့်ပြီးပူဆာတတ်တယ် ။

















ခုလောလောဆယ် သူကြိုက်နေ လိုချင်နေတာတွေက ကပ်ခွာအရုပ်လေးတွေရယ် ။
အောက်ရောက်ရင် အဲဒီဆိုင်ဘက်လက်ညှိုးထိုးတော့တာ ၊ ဆိုင်ရောက်ရင် လူကြီးလေး လို ရပ်မော့ပြီး ငေးနေသေးတာ ။ မအေ က အလွယ်ကြုံရာဖြုတ်ပေးရင် မကြိုက်တာဆို ခေါင်းကိုယမ်း   ကြိုက်တာဆို ပြုံးသွားရော ။
ဟေမာ အဲလို စိတ်တိုင်းကျ ကျေနပ်လို့ ပြုံးသွားရင် ဘယ်လို ချစ်မှန်းမသိ ။ တကယ်တော့ ကိုယ့်သမီးလေးကို ငိုလဲချစ် ရယ်လဲချစ်ရတာပါပဲ ။
အိမ်ရောက်လို့ အိမ်နံရံတွေမှာ ကပ်ခွာလေးနဲ့ လိုက်ကပ်နေပြီဆို သူ့အဖေ နဲ့ တစ်ရန်ပဲ ။ ဖအေ ကလဲ အိမ်နံရံတွေ ပေမှာ ညစ်မှာသိပ်ဆိုးတယ်။ ကလေးရှိတဲ့အိမ်ကတော့ ပေမှာ ညစ်မှာ ပွမှာပဲပေါ့တော် လို့ ပြောရတယ် ။



သူ ပူဆာတာလေးတွေရရင် ဒီလိုပြုံးပြုံးလေး





                 ဟေမာ ကပ်ခွာရုပ်လေးတွေကို သိပ်ကြိုက် သိပ်ကပ်ချင်တဲ့တရားခံက သူတက်နေတဲ့ကျောင်းပေါ့ ။ ကျောင်းက သင်လာတာတွေထဲမှာ အရောင်ခြယ်တာရယ်   နောက် စာရွက်ပေါ်ကို ကော်နဲ့ ဆန်စေ့လေးတွေကပ်တာရော။ တခါတလေ လဲ ငှက်မွှေးလေးတွေကပ်လို့  ။
ကျောင်းကတော့ ဘယ်လို တွေကပ်ခိုင်းတယ်မသိ ဟိုနေ့ကတော့ မဟေမာတို့ အိမ်ငှားကလေးအခန်းထဲ လှစ်ဆိုဝင်ပြီး သွားတိုက်ဆေးဘူး သမလာပါရောလား ။ နောက် မွေ့ယာဘောင်ကို သွားတိုက်ဆေးတွေနဲ့သုတ်ပြီး တစ်ရှုးတွေ မွပြီးကပ်ထားတာဆိုတာ ...
ကိုယ့်ကိုလဲမြင်ရော စပ်ဖြီးဖြီးနဲ့ သူလုပ်တတ်တယ်ဆိုတဲ့ အထာနဲ့လေ ။ ဒီမှာတော့ ရှော့ ဖြစ်သွားလို့ ခနနေမှ အသက်ရှုပြီး ၀က်တစ်ရှုးနဲ့သုတ် အိပ်ယာခင်းတွေ လဲ နဲ့ အတော် အမောဆို့သွားတယ် ။
သူ့အဖေ စိတ်တိုင်းကျ သုတ်ထားတဲ့ နံရံက apple white လေးဟာလဲ အခုတော့ ရောင်စုံခဲတံ တွေနဲ့ ခြစ်ထားလို့ ကြောင်ခြစ်ရောင်ဖြစ်နေပြီ ။


                   အော် ကိုယ့်သမီးလေး ဒီမှာ ကစားဖို့ အဖော်မရှိ အပေါင်းမရှိ လို့ ကစားမှ ကစားဖြစ်ပါ့မလားရယ်လို့ စိတ်မကောင်းဖြစ်ရတဲ့ အဆင့်ကို မရောက်လိုက်ဘူး ။ မိန်းကလေးရယ်လို့ သူဆော့သမျှ လိုက်သိမ်းရတာ ဂျင်ခြေကိုလည် လို့ရယ် ။
ဟော သူ တစ်ရှူးတွေ ထုတ်ပြီးဖွထားတယ်လို့ ပြန်ထည့်နေတုန်း ၊ ၀က်တစ်ရှုးတွေ ဘူးထဲကထုတ် တစ်ရွက်ချင်းဖြတ်နေ ။ ပြန်ကောက်သိမ်းတုန်း နောက်ဖေး လှစ်ဆိုထွက်သွား အမှိုက်ပုံးသွားဖွင့် ။ တခုစီထုတ် အောက်ပစ်ချ၊ ထမင်းစေ့လိုစေးကပ်ကပ်ဆို အောက်ချ ခြေထောက်နဲ့ နင်း ပွတ် ၊ အဲဒီခြေထောက်နဲ့ ဧည့်ခန်းကိုပြန်ဖြတ် တအိမ်လုံးစေးကပ်ကပ် နဲ့ ။
အိမ်ရှေ့မှာရှင်း ကြမ်းပြန်တိုက်တုန်း အိမ်ခန်းထဲမှာပိတ်ထား တံခါးကို တ၀ုန်းဝုန်းထုပြီးအော် ၊ မီးခြစ်ပုံးအိမ်လေးမှာ အိမ်နားနီးချင်း အားနာပေမယ့် မတတ်နိုင်  မောရင်တိတ်သွားလိမ့်မယ်ဆိုတဲ့ထုံးနှလုံးမူပြီး ဆက်ရှင်း ။  ခနနေလို့ အသံတိတ်သွားတော့ အော် ငါ့သမီးလေး မောသွားရှာပြီထင်ပါရဲ့လို့ တံခါးသွားဖွင့်ကြည့်လိုက် အ၀တ်ဗီရိုကိုဖွင့် ခေါက်ထားတဲ့ အ၀တ်တွေ ကို ဆွဲချ တစ်ထည်ချင်းဖြန့်ကြည့်ထား ပွလို့ ။
အမယ်မင်း တတ်လိုက်တဲ့ငါ့သမီး ..လူနဲ့ မျောက်နဲ့ များစပ်ကျထားသလားအောင်းမေ့ရ တယ် ။

နေမကောင်းသလိုမို့ရုံးလေးတစ်ရက်မသွားမိပါတယ် ထမင်းတောင် စားချိန်မရှိလိုက်ဘူး ငါ့နှယ် ။ ဖျားချင်တာတွေလွင့်စင်ပြီး ကိုယ်တွေလက်တွေ နာကျန်ခဲ့ပါရောလား ။

ဒါတောင် မနက်က မေမေနဲ့ပဲနေမယ် ကျောင်းမသွားဘူးဆိုတာကို ဇွတ်လိုက်ပို့လိုက်လို့ ကျောင်းချိန် တစ်နာရီခွဲမှာ ရေလေးချိုး ကော်ဖီလေးသောက်လိုက်ရလို့သာ ။

                     သူ့ကို ကျွေးမွေး ရေချိုးပေးပြီး အိပ်သွားတော့လဲ အော် ကိုယ့်သမီးလေး ချစ်စရာဆိုပြီး ပွေ့ဖက်ထားချင်မိသေးတယ် ။

ညနေ သူ့အဖေ ပြန်လာတော့ ၀မ်းသာအားရနဲ့ ဖေဖေပြန်လာပြီ ဖေဖေပြန်လာပြီဆိုပြီး ပြေးကြိုတော့ အော် ငါ့သမီးလေး ဖအေကိုလဲ ချစ်ရှာတယ် ၀မ်းသာအားရပြေးကြိုရှာတယ်လို့ အတွေးမဆုံးသေး ဖေဖေ့ဖုန်းရော ဖေဖေ့ဖုန်းရော နဲ့ တန်းတောင်းတော့တာပဲ ။
သူ့အဖေ ကို အမောပြေ ပန်းသီးလေးစိတ်ကျွေးတော့ ဘေးကနေ ၀င်တီးနေတာ အဟုတ် ။ စပျစ်သီးရှိသေးတယ် စားမလားလို့မေးတော့ အဲဒါ မီးမီးဟာ မစားနဲ့ လို့ အော်တော့ အင်းးး ကြီးလာရင်တော့ အားကိုးရမယ့် သမီးလေးပေပဲလို့  တွေးမိတယ် ။

ဒီလို ဒီလိုတွေ ရေးလို့ ဟေမာလေး ကို သိပ်သိပ်ကဲတယ်လို့ မမြင်ကြပါနဲ့နော် ။
ညဘက် အိပ်လို့ချမ်းရင် သမီး ရယ်ချမ်းလိုက်တာဆို စောင်ကိုမနိုင်မနင်းမပြီး ခြုံပေး တာတို့ ။ ရေသောက်ချင်လိုက်တာဆိုရင် အပြင်ထွက်ပြီး တွေ့တဲ့သူကို ရေဘူးမထည့်ခိုင်းပြီး အခန်းထဲ ရေယူလာပေးတာတို့ ။ ဖုန်းလာနေရင် မေမေ ဖုန်းလာနေတယ်ဆိုပြိး လာပေးတာတို့ လုပ်နေပါပြီ ။