Friday, January 2, 2015

ဒီဇိုင်းမျိုးဆွေသန်းရဲ့ မျက်နှာစာအုပ်ပေါ်မှ - ထိုပါယ်မယား၏သားကား ရာဇကုမာရ်မည်၏။

  ထိုပါယ်မယား၏သားကား ရာဇကုမာရ်မည်၏။( ၁ ) - Dec 4, 2014

          ရာဇကုမာရ် က ပုဂံခေတ်ကနေ ယနေ့ထိ ပုဂံထီးနန်းကို ကိုအုပ်စိုးခဲ့တဲ့ မင်း တွေနဲ့အတူ ထင်ရှားတဲ့သူ တစ်ယောက်ဖြစ်ပါတယ်။ 

            နှောင်းလူများအတွက် တန်ဖိုးများစွာပါတဲ့ ပျူ၊ မွန်၊ မြန်မာ၊ ပါဠိ လေးဘာသာ နဲ့  လေးထောင့်   ကျောက်စာတိုင်ပေါ်မှာ   လေးမျက်နှာရေးထိုးခဲ့ရုံတင်မကပဲနောက်ထပ် မိတ္တူတစ်တိုင် ပါ   ရေးထိုးခဲ့တဲ့ လုပ်ရပ်နဲ့  အဲဒီကျောက်စာ ကအကြောင်းပြုတဲ့  မြင်းကပါအရပ်ကဂူပြောက်ကြီးစေတီကိုတည်ထား
ကိုးကွယ်ခဲ့ပြီးဂူဘုရားအတွင်းမှာဗုတ္ထုတ်ပတ္တိနံရံပန်းချီများကိုရေးဆွဲလှုဒါန်း

ခဲ့ခြင်းကြောင့်ပဲဖြစ်ပါတယ်။



 ထိုပါယ်မယား၏သားကား ရာဇကုမာရ်မည်၏။( ၂ ) - Dec 4, 2014

     ရာဇကုမာရ်ရဲ့ကျောက်စာကိုရှာဖွေတွေ့ရှိရခြင်းဟာ မြန်မာစာပေသမိုင်းမှာအလွန်အရေးပါ တဲ့ဖြစ်ရပ်ပဲဖြစ်ပါတယ်၊  ခရစ်နှစ် ၁၁၁၃ ခုနှစ်ကမြန်မာစာပေကို ပျု ၊ မွန်၊ စာပေတို့နဲ့လည်းနှိုင်းယှဉ် ကြည့် နိုင်ပါတယ်။ ကျောက်စာတိုင်ကို ဂူပြောက်ကြီးဘေးကတစ်တိုင်နဲ့  ဂူပြောက်ကြီးခေါင်းရင်းကမြစေတီ  ထဲကတစ်တိုင်  တွေ့ရှိကြပါတယ်၊ အကြောင်းအရာက  ကျန်စစ်သားမင်းကြီး  သေခါနီး  နာနေတဲ့အချိန်မှာ ရာဇကုမာရ်က သူ့မိခင်ကျန်စစ်သားမိဖုရားထံ  က ရတဲ့လက်ဝတ်ရတနာတွေနဲ့ ကျွန်သုံးရွာကို ဂူဘုရားတစ်ဆူပြု ပြီး ရွှေဘုရားတစ်ဆူ ဌာပနာကာ ဂူအထွတ်တင်ပြီး ကျန်စစ်မင်းကြီးရှေ့မှောက်မှာ  ရေစက်သွန်းချ လှုဒါန်းခဲ့တဲ့အကြောင်းပါပဲ။

ပျူ  စာဖက်ကစာမျက်နှာကို  ပြင်သစ်က ပညာရှင်စီအိုဗလက်ဒင် ကဖတ်ပေးပါတယ်။ပျူ  စာ ကိုပထမဆုံးဖတ်ပေးနိုင်သူပါပဲ၊ အဲဒီတော့မှ ရာဇကုမာရ်ကျောက်စာပါ ပျူ စာလုံးတွေနဲ့  တိုက်ဆိုင်ပြီး အချို့သော ပျူ စာတွေကိုဖတ်ရှုနိုင်ခဲ့ကြပါတယ်။

ရာဇကုမာရ်ရဲ့ အလှုကို ကျန်စစ်မင်းကြီးကသာဓုခေါ်ပြီး   ကောင်းလှောင့်တေးကောင်းလှောင့်တေးလို့ မြန်မာလိုပြောတာက ပျူ  ဖက်မှာ ဟပြဆော၊ ဟပြဆောဆိုတော့ good ကိုပျူ  စာကနေ အဓိပ္ပါယ်ပြန်  လို့ရခဲ့ပြီပေါ့။ ရာဇကုမာရ်ရဲ့ကျောက်စာတိုင်ကို အခု ပုဂံယဉ်ကျေးမှုပြတိုက်ကြီးရဲ့ ကျောက်စာ ပြခန်းမှာ    အမှတ်စဉ် ( ၁၀ )ရေးထိုးပြီးထိန်းသိမ်းထားပါတယ်၊    သက္ကရာဇ် ၄၇၄ ရေးထိုးထားတဲ့ ဒီကျောက်စာက ပျူ၊ မွန်၊ပါဠိ၊ မြန်မာ  လေးဘာသာ   ရေးထိုးထားပြီးမြန်မာဖက်မှာ စာကြောင်းရေ ( ၃၉ )  ကြောင်းပါပြီး    ပုရှာသ္ခင်သာသနာ အနှစ်တစ်ထောင့်ခြောက်ရာနှစ်ဆာယ် ဟေတ်နှစ် ---နဲ့  အစချီထားပါတယ်။

ဒုတိယကျောက်စာတိုင်ကိုတော့ မြစေတီစေတီဝင်းအတွင်း စေတီရဲ့အရှေ့တောင်ထောင့်မှာ စိုက်ထူထိန်းသိမ်းထားပါတယ်၊ ကျောက်စာပါအကြောင်းအရာအရ   ဂူပြောက်ကြီး  စေတီနဲ့  သက်ဆိုင်ပြီး မြစေတီနဲ့သက်ဆိုင်ခြင်းမရှိပါ။
ဒါ့ကြောင့် မြစေတီကျောက်စာဆိုတာထက် ဂူပြောက်ကြီးကျောက်စာ၊ ရာဇကုမာရ်ကျောက်စာလို့သာပညာရှင်များကညွှန်းဆိုပါတယ်။
ဂူပြောက်ကြီးဆိုတဲ့အမည်ဟာလည်း နှောင်းအမည်ဖြစ်ပြီး အပြောက်အမွှန်းတွေကထူးခြားစွာကောင်းမွန်လို့ ဂူပြောက်ကြီးလို့ခေါ်ပုံရပါတယ်။




 ထိုပါယ်မယား၏သားကား ရာဇကုမာရ်မည်၏။( ၃ ) - Dec 4, 2014

   ရာဇကုမာရ် က ကျန်စစ်သားရဲ့သား ဟုတ်မဟုတ်ဆိုတဲ့ပြဿ     နာရှိပါတယ်၊ ရှေ့က ဆရာ့ဆရာများရဲ့ဆရာ Old Burma Early Bagan ကိုရေးခဲ့တဲ့ ဒေါက်တာလုစ်က မြန်မာ့သမိုင်းကို စောစီးစွာ သုတေသန လုပ်ခဲ့တယ်၊ ကျွန်တော်တို့ကသူ့အပေါ်မှာ ကျေးဇူးရှိပါတယ်။
အဲဒီဒေါက်တာလုစ်ကလည်းဇာတ်လမ်းတချို့ကိုဆက်စပ်စဉ်းစားရာကနေ စိတ်ပါလွန်သွားပြီး တစ်ချို့ အကြောင်းအရာလေးတွေက သမိုင်းဆိုင်ရာ ဇာတ်ကောင်တစ်ချို့ကို သိပ် ပြီးချစ်ခင်သွားတဲ့ ဆုံးဖြတ်ချက်တွေလည်း ရှိရာမှာ ရာဇကုမာရ်ဟာအမှတ်ပြည့်အမြဲတမ်းရသူတစ်ဦးပဲဖြစ်ပါတယ်။
ဖခင်ကျေးဇူးအထူးသိသူဆိုတဲ့ ICON က ရာဇဝင်ထဲမှာ ရာဇကုမာရ်ပဲ ဖြစ်ခဲ့တယ်၊ နောင်တော့ ပညာရှင်တော်တော်များများက မိဖုရားတြိလောက ဝဋံသကာဒေဝီကိုတော့ မိခင်လို့ညွှန်းဆိုပါလျက် ကျန်စစ်မင်းကိုတော့ ကျွေးမွေးစောင့်ရှောက်ခဲ့တဲ့ကျေးဇူးကိုပဲပြောပြီး မွေးကျေးဇူးအကြောင်း မပြောပါ၊  ဖခင်လို့ သက်ရောက်စေတဲ့ အရေးအသားတစ်လုံးတစ်ပါဒမှ မတွေ့ ရပဲ မင်းကြီး မင်းကြီးလို့သာအကြိမ်ကြိမ်သုံးစွဲထားပါတယ်
။မြန်မာတို့စိတ်နှလုံးမှာစွဲမြဲခဲ့သူတစ်ယောက်ဖြစ်ခဲ့တော့လည်း ကျန်စစ်မင်းကြီးရဲ့သားအဖြစ်ကနေ ပြောင်းပြီးစဉ်းစားဖို့ခက်ခဲ့ကြပါတယ်၊ ရာဇဝင်ကြီးတွေကလည်းမြေးကားအရင်းသားကအဖျားဖြစ်ခဲ့လေပြီလို့လည်းညွှန်းခဲ့ကြတော့ မြေးဖြစ်သူ အလောင်းစည်သူကိုထီးနန်းပေးခဲ့လို့ ရာဇကုမာရ်ဟာ အားလုံးရဲ့   မေတ္တာတွေကို သိမ်းပိုက်ခဲ့တယ်ဆိုကြတာပေါ့၊ အမှန်ကသူ့လုပ်ရပ်တွေကသပ်သပ်ရပ်ရပ်နဲ့ နောင်အရှည်ထိသူ့လုပ်ရပ်ကိုတည်တံ့အောင်ထိစီမံကာ ရည်ရွယ်ချက်ရှိရှိ ရည်မှန်းချက်ရှိရှိ လုပ်ဆောင် သွားတာ   တွေကြောင့်ပါ။
ပုဂံကနေ အခု ကားနဲ့ ၄၅ မိနစ်လောက် သွားရမယ့် မြကန်နားမှာ ကျန်စစ်မင်းလက်ထက်ကဆောက်ခဲ့တဲ့ စာကြည့်တိုက်မှာ ရာဇကုမာရ်ဟာ ဆရာတော်သံဃာတော်တွေနဲ့ သီဟိုဠ်ကလာတဲ့ ပိဋကတ်သုံးပုံကိုကူးယူတဲ့လုပ်ငန်းကို လုပ်နေခဲ့တာဟာ သာသနာသန့်စင်ရေးကြိုးပမ်းမှုလို့   ခေါင်းစဉ်တပ်လိုက တပ်နိုင်ပါတယ်၊     အဲဒီပိဋကတိုက်မှာ သူဘာတွေလုပ်နေသလဲ ဆိုတာကို မြင်းကပါဂူပြောက်ကြီးကနံရံပန်းချီတွေထဲမှာ တွေ နိုင်ပါလိမ့်မယ်၊ ပုဂံအလံကျောက်စာမှာ တွေ့နိုင်ပါလိမ့်မယ်။

ဆရာမောင်ခင်မင် ဓနုဖြူ က ရန်ကုန်တက္ကသိုလ်က   မြန်မာစာပါမောက္ခတစ်ယောက်ပါ။
         ဆရာက ချစ်သူခင်သူများကိုသုတ်သင်ခြင်းဆိုတဲ့စာအုပ်မှာ ရာဇကုမာရ်ကို ကျန်စစ်သားရဲ့သား မဟုတ်ကြောင်းပြောပါပြီ။   ကျွန်တော့်အထင်မေးရင်လည်း မဟုတ်နိုင်လို့ပြောပါမယ်၊   ပြီးခဲ့တဲ့နှစ်ကမြစ်သားကနေတွေ့ရှိတဲ့ ( ၅ ) ဘာသာနဲ့ရေးထိုးထားတဲ့  စောလူးမင်းကျောက်စာက ခုနှစ်ပါတဲ့   ကျောက်စာ ထဲမှာ အစောဆုံးတွေ့ရှိရတဲ့ရာဇကုမာရ်ရဲ့
 ကျောက်စာထက် စောတဲ့ကျောက်စာဖြစ်သွားပြီး တစ်ဘာသာပိုတဲ့ကျောက်စာအဖြစ်လည်းတွေ့ရှိမှုမှာ  ရှေ့ကိုရောက်သွားပါပြီ၊     အဲဒီကျောက်စာမှာ   စောလူးမင်းက ကျန်စစ်သားကို   ကျေးဇူးတင်တဲ့စာသွားလေး လဲပါသလို ဆက်စပ်စဉ်းစားစရာတွေ အများကြီးရတဲ့ ကျောက်စာလည်းဖြစ်သွားပါပြီ၊ မတော် ရာဇကုမာရ် ဟာ စောလူးမင်းရဲ့ ဆွေမျိုးသားခြင်းဖြစ်သွားနိုင်တဲ့ဖက်ကိုလည်း ဦးတည်နေပါပြီလို့ ပြောပါရစေ။



ထိုပါယ်မယား၏သားကား ရာဇကုမာရ်မည်၏။( ၄ ) - Dec 5, 2014

      ရာဇကုမာရ် ပိဋကတွေကို ကူးယူခြင်းလုပ်ခဲ့တဲ့ စာကြည့်တိုက်ဆိုတာ တူရွင်းတောင်ခြေ၊ မြကန်နဲ့ မလှမ်းမကမ်းက ယာခင်းတစ်ခုထဲမှာပါ၊ ဒါပေမယ့် အခုမရှိတော့ဖူး ရွာသားတွေက ကျောက်လိုရင် အဲဒီကနေသွားသွားယူနေကြပါ၊    ရှေးဟောင်းသုတေသနက ၁၉၀၅ ခုနှစ်နဂ္ဂတစ်အမှတ် ၄၀၅   အရ ဓါတ်ပုံဟောင်းထဲမှာ ကျောက်ဇာပြတင်းလှလှကြီးနဲ့တွေ့နိုင်သလို၊ ဒေါက်တာ လုစ်ရဲ့ Old Burma Early Bagan မှာလည်းဓါတ်ပုံတွေ့နိုင်ပါသေးတယ်။
       ၁၉၁၈ခုနှစ်က မြောက်ဖက်နံရံပြိုလို့အနီးအနားရွာသားတွေကကျောက်တုံးတွေကိုလိုရာသုံးဖို့ ယူသွားပါသေးသတဲ့။   သူများတွေသိရင်တော့ ရှက်စရာကောင်းလှသလို ကြားလို့လည်း    ကောင်းလှမယ်   တော့မဟုတ်ပါ။
၁၉၅၇ နှစ်က ညောင်ဦးကျောက်ပန်းတောင်းကားလမ်းဖောက်ရာမှာကျောက်သွင်းခွင့်ရတဲ ကန်ထရိုက်က အဲဒီပိဋကတိုက်ကိုဖျက်ပြီးကျောက်တုံးအားလုံးကို လမ်းတံတားဌာနကို ကျောက်သွင်းပါသတဲ့၊
သူများမေးရင်ရဲရဲသာဖြေလိုက်ပါ၊   မင်းတို့ရဲ့ပထမဦိးဆုံးစာကြည့်တိုက်ဘယ်ရောက်သွားပြီလဲလို့ဆိုရင် လမ်းခင်းပစ်လိုက်ပြီလို့။
အဲဒီတော့လည်း ကျွန်တော်တို့စာမတတ်တာ သိတ်မဆန်းတော့ပါဘူး။ ပြီးတော့လည်း အဲဒီအဆောက်အဦက ပုဂံမှာရှိတဲ့ကျောက်နဲ့ဆောက်တဲ့အဆောက်အဦ လေးခုပဲရှိတဲ့အထဲက တစ်ခုအပါအဝင်ပါ၊ ဒါ့အပြင်ရခိုင်ရိုးမရဲ့ အရှေ့ဖက်ခြမ်းမှာမှာ ကျောက်နဲ့ဆောက်တဲ့အထဲမှာ ဒီပိဋကတိုက်ကအကြီးဆုံးပါတဲ့။
   ကျွန်တော် အခု ဒီစာကြည့်တိုက်ကိုရောက်ပါတယ်  အဆောက်အဦရဲ့ အောက်ခြေ ပန္နက်ခုံ   တော့ကျန်နေပါသေးတယ်၊  အဲဒါကိုရှေးဟောင်းကအားကြိုးမာန်တက် ထိန်းသိမ်းထားရပုံက အခုပညာကို မတတ် တတ်အောင် အားထုတ်နေရပုံနဲ့သိပ်တူတော့တာပါပဲ။






 
 ထိုပါယ်မယား၏သားကား ရာဇကုမာရ်မည်၏။( ၅ )

       ပုဂံခေတ် အနော်ရထာလက်ထက် မှာကတည်းက စာကြည့်တိုက်ရှိပါတယ်။  ပိဋကတ်တွေကို သိုလှောင်တဲ့ အဆောက်အဦကို ရွှေဂူလို့ ခေါ်လေ့ရှိပါတယ်၊  ပထမဦးဆုံး ပိဋကတ်တိုက်က သရပါတံခါးကနေဝင်ပြီး သဗ္ဗညုစေတီကြီးဖက်ကွေ့တော့ ရွှေဂူကြီးစေတီခေါင်းရင်းက အဆောက်အဦပေါ့။
အနော်ရထာမင်းလက်ထက်ကပိဋကတိုက်ကို ကုန်းဘောင်ခေတ်က ဘိုးတော်ဘုရား(၁၇၈၂-၁၈၁၉)က ၁၇၈၃ မှာ ပြန်လည်ပြင်ဆင်လှုဒါန်းလိုက်လို့ ကုန်းဘောင်ခေတ်လက်ရာဖြစ်နေပါပြီ၊
မူလ လက်ရာဆိုလို့ ကျောက်ဇာပြူ တင်း(၃) ခုနဲ့ မူလအုတ်အဝန်းအဝိုင်းပန္နက်တုိ့သာ ကျန်ပါတော့တယ်။
ရာဇဝင်တွေမှာတော့ သထုံကပင့်လာခဲ့တဲ့ ပိဋက အစုံ(၃၀) ကိုသိမ်းဆည်းသိုမှီးတယ်လို့ရေးကြပေမယ့် ဆရာကြီးဒေါက်တာသန်းထွန်းကတော့ သထုံကနေပေိဋကတ်တွေ သိမ်းလာ တယ်ဆိုတာ ကျောက်စာအထောက်အထားမရှိသလိုပိဋကတ် အစုံ(၃၀) လည်းမဆန့်ပါဖူး တစ်စုံပဲ သိမ်းလို့ရပါတယ်လို့ဆိုပါတယ်။
နန်းတော်ရာခေါင်းရင်းကရွှေဂူကြီးဘုရားဟာလည်း ရွှေဂူလို့ဆိုတဲ့အတွက်ပိဋကတ်တွေသိမ်းတဲ့နေရာပါပဲတဲ့၊

  ရွှေဂူကြီးကို အလောင်းစည်သူလို့ခေါ်တဲ့ ပထမစည်သူက (၁၇၊ မေ ၁၁၃၁ မှာတည်ပြီး ၁၇၊ ဒီဇင်ဘာ၊ ၁၁၃၁) မှာပြီးတယ်၊
အဲဒီရွှေဂူကြီးပါဠိကျောက်စာမှာ
« ကာရာပေတွာ လိခါပေတွာ ပိဋကတ္တယ မုတ္တမံ"
ထိုအခါ အဖိုးမဖြတ်နိုင်သော ပိဋကတ်များကို ကူးယူစေသည် လို့ပါတယ်။
အဲဒီပိဋကတ်တွေကိုရွှေဂူကြီးမှာထားတယ်၊ ဒါ့ကြောင့် ရွှေဂူပါရင်စာကြည့်တိုက်
လို့ သတ်မှတ်လို့ရပါတယ်။
- ရှုကူပ္လုရုယ်ပိတကတ်အဥိသုံး က္လံတရျ၃ဆူ (မေ၊၁၂၁၃၊ သန်လျင်ဥိကပ်သင့်ချန်)
- သ္ခင် ပ္လုသော ပိတကတ်၊ ငါရှိခိုဝ်အံ့၊ ပိတကတ် ရှုယ်ဂူတွင် ထာလသိယ်
၉၊ဖေဖေါ်ဝါရီ၊၁၂၃၀၊ သ္ခင်မြင်ခုန်တိုင် ကျောက်စာ ) စတဲ့ ပုဂံခေတ်ကျောက်စာတွေမှာ ရှယ်ဂူ ဆိုတဲ့ ရွှေဂူပြုတယ် ဆိုတာတွေမှာလည်းတွေ့ နိုင်ပါတယ်။
         ဒုတိယ စာကြည့်တိုက်ဖြစ်တဲ့ မြကန်စာကြည့်တိုက်က ကျန်စစ်သားမင်းကြီး တည်ဆောက် ခဲ့တာဖြစ်ပြီး သီဟိုဠ်ကတင်သွင်းခဲ့တဲ့ သီဟိုဠ်မူ ပိဋကတ်သုံးပုံနဲ့ ညီညွတ်အောင် ကျန်တာတွေကို တိုက်ဆိုင်စစ်ဆေးတယ်၊ အသစ်လည်း ကူးရေးတဲ့နေရာလည်းဖြစ်တယ်၊ ဒီတာဝန်ကို ရာဇကုမာရ်က အားကြိုးမာန်တက် ထမ်းဆောင်ပြီး သီရိလင်္ကာ၊ မွန်၊ မြန်မာက ရဟန်းပညာရှိ လူပညာရှိတွေနဲ့
ပိဋကတ်သန့်စင်ရေးကို မြကန်ကစာကြည့်တိုက်မှာ လုပ်ဆောင်ခဲ့တာဖြစ်တယ်။
အဲဒီမြကန်နားမှာ ကျန်စစ်သားရေးထိုးခဲ့တဲ့ ကျောက်စာ (၂)ချပ် ကျန်ရစ်ပါတယ်၊ မြကန်ကျောက်စာနဲ့  အလံပုဂံကျောက်စာပါ၊ မြကန်ကျောက်စာမှာတစ်ဖက်ပိတ်ကန်ဖြစ်တဲ့  မြကန်ကို
မဟာနိဗ္ဗာန်လက်ဆွဲချီရေကန်လို့ မင်းကြီးကအမည်ပေးပြီး အဝိဇ္ဇာခွင်းလို့ အလင်းပေးမယ့်အကြောင်းကို နတ်ပြည်တံခါးကိုဖွင့်လှစ်ကာ လူအပေါင်းတို့ကို နတ်ပြည်သိုပို့ဆောင်လမ်းပြတော်မူပါမယ်
လို့ဖော်ပြထားပါတယ်။


ထိုပါယ်မယား၏သားကား ရာဇကုမာရ်မည်၏။( ၆ ) - Dec 6,2014

မြကန် ကျောက်စာမှာ ကျန်စစ်မင်းကြီးလို့ အများခေါ်တဲ့ ဂြီ တြိဘုဝနာဒိတျဓမ္မရာဇာမင်းဟာဗျာဒိတ်ခံမင်း ဆိုတာကိုတော့ က၊ ခ၊ ဂ၊ ထိတော့ ရေးထိုးနေတုန်းပါပဲ၊
( ဂ ) မျက်နှာမှာတော့အလုံးစုံသော  ပိဋကတ်တော်မြတ်ကို သန့်ရှင်းစင်ကြယ်တည့်မှန်စေရန်  စီမံရေးသား ချီးမြှင့်လတ္တံ့၊ ဓမ္မစည်ကြီးအသံကို အနှံ့အပြားမြည်ဟည်းစေလတ္တံ့။
--- --- --- --- --- --- --- --- --- --- ---
တောက်ပြောင်သောရွှေဖြင့်ပြီး၍ ရတနာခုနစ်ပါးတို့ဖြင့် ခြယ်လှယ်မွန်းမံ ထားသော  နတ်ပြည်တံခါး၏ ကန့်လန့်ကျင် ကိုမ၍ ဖွင့်ပေးပြီးနောက် လူအပေါင်းတို့အား နတ်ပြည်သို့ ပို့သွင်းလတ္တံ့။


(ဃ) မျက်နှာ မှာတော့ အတို့သခင် အရှင်တရားမင်းသည် ရေကိုမြဲမြံစွာ
ဆည်စေ၏၊ ရေကန်ကိုတူးစေ၏၊
--- --- --- --- --- --- --- --- --- --- --- ---
ဤရေကန်ကိုတူးပြီးလျင် ကျေးငှက်နှင့် လူသတ္တဝါအပေါင်းတို့၏ အကျိုးစီးပွားအလို့ငှာ မဟာနိဗ္ဗာန် လက်ဆွေခိရေ - ဟူသောအမည်ကို ပေးတော်မူ၏၊ လူအပေါင်းတို့သည် သိကြကုန်လော့။ လို့ ရေး ထိုး သွားတဲ့ အတွက် မြကန် နဲ့  ပိဋကတိုက်တည်ဆောက်ချိန်ဟာ တပြိုင်တည်းဖြစ်ပြီး ခရစ်နှစ် ၁၀၉၀ နဲ့ ၁၁၁၀ ဝန်းကျင်ကလို့ယူဆရပါတယ်။
ရာဇကုမာရ် တစ်ယောက် မြကန်စက္ကူတိုက်လို့ အစဉ်အလာခေါ်ခဲ့ကြတဲ့ နှောင်းလူတွေ ဖျက်ဆီးပြီး လမ်းခင်း ပစ်လိုက်တဲ့ မြကန်စာကြည့်တိုက်မှာ ဘာတွေလုပ်ခဲ့မယ်ဆိုတာ ခရစ်နှစ် ၁၁၁၃က သူ တည်ဆောက်ပြီး၊
သူ့အလှုမှတ်တမ်း  ကို  ပျူ၊ မွန်၊ မြန်မာ၊ ပါဠိ လေးဘာသာနဲ့ ဆင်တူ   နှစ်တိုင်    ကျောက်စာရေးထိုးခဲ့တဲ့  မြင်းကပါအရပ်က  ဂူပြောက်ကြီးစေတီက အတွင်း နံရံတွေမှာ ရေးဆွဲခဲ့တဲ့ နံရံပန်းချီတွေထဲက ယနေ့ထိ ကြွင်းကျန်ရစ်ခဲ့တဲ့ နံရံပန်းချီဧရိယာ စတုရန်းပေ ၄၇၇၉ ဒဿ     မ ၉ ထဲမှာ ခြေရာခံလို့တွေ့မြင် နိုင်ကြပါလိမ့်မယ်။








ထိုပါယ်မယား၏သားကား ရာဇကုမာရ်မည်၏။( ၇ ) - Dec 7, 2014

  ပုဂံကဗိသုကာကို ပညာရှင်တွေက ခေတ်ဦးကာလ ( ခရစ်နှစ် ၈၄၉ ကနေ ၁၁၁၃ )
ခေတ်ပြောင်းကာလ ( ခရစ်နှစ် ၁၁၁၃ ကနေ ၁၁၇၄ ) ခေတ်နှောင်းကာလ ( ၁၁၇၄ ကနေ ၁၂၈၇ ) လို့သတ်မှတ်ကြတယ်။
မြင်းကပါဂူပြောက်ကြီးက ခေတ်ပြောင်းကာလမှာတည်ဆောက်ခဲ့တဲ့ဂူဘုရားဖြစ်တယ်။

    ဒါကြောင့်ရာဇကုမာရ်ရဲ့ ဂူပြောက်ကြီးတည်ဆောက်တဲ့အချိန်ဟာ ပုဂံရဲ့ ဗိသုကာပညာရပ်နဲ့ အနုပညာအဆင့်အတန်းဟာ အရှိန်ရပြီး ထိပ်တန်းကျနေပြီဖြစ်တယ်၊ ပန္နက်ပုံစံသဘောကတော့ အလယ်မှာ
မဏ္ဍိုင်ခံပြီးံကြောင်လည်စင်္ကြံပတ်လမ်းနဲ့တကွ နံရံလေးဘက်တက် ထားသည့် အခြေခံလေးထောင့်အဆောက်အဦမျိုးကို အာရုံခံခန်းမနဲ့ ဆက်ထားတဲ့ပုံစံမျိုးပဲဖြစ်ပါတယ်။
အဲဒီ ကြောင်လည်ပတ်လမ်းတလျောက်က ဝဲ၊ယာနံရံတွေမှာ ပုဂံခေတ်ရဲ့ အပြောင်မြောက်ဆုံးသော  ပန်းချီလက်ရာတွေက လွတ်လပ်ရဲရင့်သော စုတ်ချက်တွေနဲ့ အတူ အသက်ဓါတ်တွေ ဖျတ်ဖျတ်လူးလို့လွန့်လို့
ယနေ့မြင်တွေ့နေရတာဟာ အသိဥာဏ်ပညာထဲကို ရာဇကုမာရ်က သူ့နှလုံးသားထည့်သွင်းသွားခဲ့တာ အမှန်ပဲလို့ ဆိုပါရစေ။




ထိုပါယ်မယား၏သားကား ရာဇကုမာရ်မည်၏။( ၈ ) - Dec 7, 2014

    မြင်းကပါအရပ်က ဂူပြောက်ကြီးစေတီမှာရေးဆွဲခဲ့တဲ့နံရံပန်းချီက ကျွန်တော်အကြိုက်ဆုံးနံရံပန်းချီ (၅) ခုထဲမှာပါတယ်၊ အဲဒီထဲမှာမှ ဒီဂူပြောက်ကြီးဆရာက စုတ်ချက်တွေ လွတ်လပ်တယ်၊ ရဲရင့်တယ်၊
အမှောင်များတဲ့လှိုဏ်ဂူထဲမှာ ကျောက်ဇာပြတင်းကနေဝင်မယ့် အလင်းရောင်ပြပြပဲရှိလေတော့ ရဲလိုအော်ကာဆိုတဲ့ မြေဝါရောင်ကဲပြီး ရေးဆွဲထားခဲ့တာကိုက ရည်ရွယ်ချက်ရည်မှန်းချက်နဲ့ရေးဆွဲခဲ့တာ
ပေါ်လွင်ပြီးသားလို့ဆုံးဖြတ်မိတယ်။
     ရေးဆွဲခဲ့တဲ့ အကြောင်းအရာတွေက မြကန်တောင်ခြေက ပိဋကတိုက် မှာ သီဟိုဠ်က ထေရဝါဒကို   ဇောင်းပေးတဲ့ ပိဋကတ်သုံးပုံကိုတင်သွင်းပြီး ပိဋကတ်သန့်စင်ရေး ဦးစီးလုပ်ကိုင်နေတဲ့ ရာဇကုမာရ် အမတ်ကြီးရဲ့ အသိဥာဏ်ပညာတွေ ထင်ဟပ်နေတယ်၊ အုပ်ချုပ်သူဘုရင်၊ မင်း တည်ဆောက်တာမဟုတ်ပဲ အမတ်တစ်ယောက်ကတည်ဆောက်တဲ့ စေတီ၊ ဂု၊ ပုထိုးကို ဘုရင်၊ မင်းဖြစ်သူ ကျန်စစ်မင်းကြီးကိုယ်တိုင်
သာဓုခေါ်ခဲ့တဲ့အကြောင်းကို စနစ်တကျမှတ်တမ်းတင် ထားခဲ့တယ်။
   အဲဒီအတွက်လည်း ရာဇကုမာရ်ရဲ့ ဂူပြောက်ကြီးစေတီဟာ ယနေ့အချိန်မှာ ဘုရင်မင်းတွေရဲ့ ကုသိုလ်ဘုရား  တွေနဲ့ အတူ လှည့်လည်ကြည့်ရှုသူတွေရဲ့ စာရင်းဇယားမှာ ထိပ်ဆုံးကနေ ပါဝင်နေခဲ့တာပါပဲ။
ဂူပြောက်ကြီးမှာရေးဆွဲခဲ့တဲ့ နံရံပန်းချီတွေက အကြောင်းအရာအားဖြင့် ပိဋကတ်စာပေဖြစ်တဲ့ သုတ်၊ ဝိနည်း၊ အဘိဓမ္မာတို့ကကောက်နှုတ်ချက်တွေ ဝံသစာပေတွေထဲက ကောက်နှုတ်ချက်တွေကနေ မူရင်းကျပြီး အတုယူ လိုက်နာသင့်တာတွေကို ထုတ်နှုတ်ရေးဆွဲထားခြင်းပဲဖြစ်ပါတယ်။
ဒါ့အပြင်လူနေမှုစနစ်နဲ့မကင်းကွာတဲ့ သင်ကြားစရာတွေအသင့်ပါပြီးဖြစ်တဲ့ ၅၅၀ ဇာတ်နိပါတ်တွေ ကိုနာမည်နဲ့တကွဖော်ပြခဲ့တယ်။
တကယ်တော့ ၅၅၀ ဇာတ်တော်တွေဆိုတာ ၅၄၇ ဇာတ်ပဲရှိပြီး အနီးဆုံး ၅၅၀ ကိုမှတ်ပြီး ၅၅၀ လို့မှတ်ယူခြင်းပဲ၊ ဂေါတမဗုဒ္ဓဘုရားမဖြစ်မီ နုစဉ်ကာလ သုမေဓာရသေ့ဘဝမှာ ဗျာဒိတ်ခံယူပြီးနောက် ဘဝပေါင်းများစွာပါရမီဖြည့်စဉ် ကျင်လည်ခဲ့ရတဲ့ဖြစ်ရပ်တွေကို ဘုရားဖြစ်ပြီး အခါအားလျော်စွာဟောကြား
ခဲ့တဲ့ ဒေသနာဖြစ်စဉ်တွေပဲဖြစ်တယ်၊ ၅၅၀ဇာတ်ကို ၅၄၇ ကိုလိုတဲ့ဇာတ်ကို ဝေမာလဇာတ်၊ မဟာဂေါဝိန္ဒဇာတ်နဲ့ သုမေဓပဏ္ဍိတ ဇာတ်တို့ကိုဖြည့်ပြီး ၅၅၀ ပြည့်အောင်ြ ဖည့်ထားတဲ့ လမ်းကြောင်းလည်းရှိတယ်၊   ဖက်လိပ်ဘုရားက ရွှံ့မီးဖုတ်လက်ရာတွေက အဲဒီ ၅၅၀ ဇာတ် အပြည့်ဖြစ်တယ်၊ သီဟိုဠ်ကလာတဲ့ မူက ၄၉၇ ဇာတ်ပဲဖြစ်တယ်၊ သီဟိုဠ်သာသနာဆိုတာက အခုထိမြန်မာတွေ လိုက်နာကျင့်ကြံကြတဲ့ ကိုယ်လုပ်မှကိုယ်ရတဲ့ လွတ်မြောက်ရာလမ်း နိဗ္ဗာန်
ရှိတဲ့. ထေရဝါဒီ သာသနာပဲဖြစ်တယ်။
ပုဂံကို ဝင်ရောက်လာတဲ့ သာသနာလမ်းကြောင်းကိုလည်း ၅၅၀ ဇာတ်တော်က ၅၅၀လား ၄၇၅ လားဆိုတာကြည့်ရင်သိနိုင်ပါသေးတယ်၊ အခု မြင်းကပါဂူပြောက်ကြီးက ၅၄၇ ဇာတ်ဖြစ်တယ်။
မြင်းကပါဂူပြောက်ကြီးနံရံပန်းချီရဲ့ ထူးခြားချက်ကတော့ ကျောက်ဇာပြတင်း ဆီကို တက်တဲ့ လှေခါးထစ်    တွေမှာကို နံရံပန်းချီိတွေရေးဆွဲခဲ့လေတော့ နေရာလပ်မရှိအောင်ကို အမွှမ်းအပြောက်   တွေထည့်သွင်းခဲတာပါပဲ။ ဒါ့ကြောင့် ဂူပြောက်ကြီးနာမည်ရတာဖြစ်လိမ့်မယ်။
ရာဇကုမာရ်ကျောက်စာက ပျူ၊ မွန်၊ မြန်မာ၊ ပါဠိ လေးဘာသာမှာ အဓိပ္ပါယ်အတူတူဖြစ်ပေမယ့် ပျူ၊ မွန်၊ မြန်မာ က စကားပြေဖြစ်ပေမယ့် ပါဠိစာဖက်မှာတော့ လင်္ကာနဲ့ ဂါထာသီကုံးထားခြင်းဖြစ်တယ်။
အမစ္စော ရာဇကိစ္စေသု ဗျာဝတော သတိ မာဝိ ဒူ လို့ရေးဖွဲ့ ခြင်းဟာ ထိုရာဇကုမာရ်ဆိုတဲ့ အမတ်ဟာ မင်းမှုကိစ္စတွေမှာ ကြောင့်ကြစိုက်တတ်ပြီး သတ၊ ဥာဏ်ပညာရှိတဲ့သူလို့အဓိပ္ပါယ်ရတယ်။
အဲဒီ စာကြောင်းရေ (၁၀) ကနေ(၃၀) ရောက်တော့ ရာဇကုမာရ် ရာထူးတက်သွားပြီ     ဖြစ်တယ်ပြောရတော့မယ်၊
“ သောတံ မဟာမစ္စော ဗိမ္ဗံသော ဝဏ္ဍယံ သုဘံ၊ ပတိဋ္ဌာ ပိယကာရေသိ၊
ဂုဟံ ကဉ္စနထူပိကံ "လို့ရေးထိုးသွားပြီဖြစ်တယ်
အဓိပ္ပါယ်ကတော့ ထိုရာဇကုမာရ်မည်သော အမတ်ကြီးသည် တင့်တယ်သော၊ ရွှေဖြင့်ပြီးသော
ထိုဆင်းတုကို ဌာပနာ၍ ရွှေအထွတ်မူသော လှိုဏ်ဂူပြု၏။တဲ့
ပညာရှင်များကလည်း   ကျန်စစ်မင်းရဲ့သားဖြစ်မဖြစ်ကို  စဉ်းစားဖို့အတွက် ဆိုင်ရာ   ကျောက်စာဖတ်ပညာရှင်များက  လေးဘာသာလုံးမှာလည်း ရာဇကုမာရ်က ကျန်စစ်မင်းကြီးရဲ့  ကျေးဇူးဂုဏ်ကို အောင့်မေ့ဆင်ခြင်လို့ ပြုတဲ့ဒီကုသိုလ်မှာကျန်စစ်မင်းကြီးရဲ့ မွေးကျေးဇူးဆိုတဲ့ ဂုဏ်ကိုကောက်ယူ လို့ရမယ့် စကားလုံးနဲ့ အထောက်အကူရစေမယ့် စကားလုံးပါဝင်ခြင်းမရှိဘူး
လို့ ပြောဆိုခဲ့ပြီးလည်းဖြစ်ပါတယ်။
မည်သို့ပင်ဆိုစေ ထိုပါယ်မယား၊ တြိလောကဝဋံသကာဒေဝီမိဖုရား ဦးဆောက်ပန်းရဲ့သား မင်းမှုရေးရာကျွမ်းကျင်သူ ရာဇကုမာရ် ဟာ လွန်ခဲ့တဲ့ နှစ်တစ်ထောင်နီးပါးကပင် အသ်ိဥာဏ်ပညာတရားဓမ္မတို့နဲ့ ပြည့်စုံပြီး လုပ်ရပ်အားလုံးကို ရည်ရွယ်ချက်ရှိရှိရည်မှန်းချက်ရှိရှိနဲ့
လုပ်ဆောင်သွားတဲ့အပြင် သူ့နှလုံးသားကိုပါထည့်သွင်းခဲ့တဲ့အတွက် နှောင်းလူများအတွက် တန်ဖိုးမဖြတ်နိုင်တဲ့ သာသနာလမ်းကြောင်း အနုပညာလမ်းကြောင်းနဲ့ စာပေ လမ်းကြောင်းတို့အတွက် သူ့လုပ်ရပ် တွေက ထိပ်ဆုံးကထားနေရခြင်းပဲလို့ပြောချင်ပါတယ်။
မြင်းကပါဂူပြောက်ကြီးထဲက နံရံပန်းချီဟာ ပုဂံမှာ နှစ်အစောဆုံး၊  လက်ရာအကောင်းဆုံး၊  ဆေးရောင်အကျန်ဆုံးနဲ့ နံရံပန်းချီကျန်ရှိဧရိယာစတုရန်းပေ ၄၇၇၉ ဒဿ     မ ၀၉ ထိကျန်ရှိနေပါတယ်၊ ဒါဟာရေးဆွဲခဲ့သမျှရဲ့  ၃ ပုံ ၂ ပုံသာကျန်ရှိခြင်းဖြစ်လို့ ဒီဧရိယာကို ဆက်လက်ပြီးကျန်ရှိစေခြင်ပါတယ်။
အခု ပုဂံဒေသကို ကမ္ဘာ့ယဉ်ကျေးမှုအမွေအနှစ်စာရင်းဝင်ဖို့ကြိုးစားနေပြီဖြစ်လို့ ထိုပါယ်မယားရဲ့သား ရာဇကုမာရ်ရဲ့ မြင်းကပါဂူပြောက်ကြီးနဲ့ သူ့ဝမ်းထဲမှာငုံ ထားတဲ့နံရံပန်းချီတွေကို   မြန်မာရဲ့အစောင့်ရှောက်ခံသာမက ကမ္ဘာရဲ့ အစောင့်ရှောက်ခံဘဝကိုရပြီး ကမ္ဘာတည်သ၍လည်း သူ့လုပ်ရပ်ကိုတည်ပါစေ လို့ ဆန္ဒပြုရင်း ထိုပယ်မယား၏သားတစ်ယောက် ကို ဒီမှာပဲနိဂုံးချုပ်အပ်ပါတယ်။

ဒီဇိုင်း မျိုးဆွေသန်း
၅ နာရီ ၁၀ မိနစ်
မောနင်းစတား၊ ရန်ကုန်။





No comments:

Post a Comment