Wednesday, August 29, 2012

ဒေါက်တာစိုးလွင် - ဆေးရုံက မဆင်းရ သေမင်းက အိမ်မှာ နှင့် ....ထဲ မှ စာသားများ (၁)













သားပျက် သားလျှော ဘ၀အမော ထဲ မှ ရွေး ဖတ်ချင်သော စာသားများ

                   အပျိုဖြန်းအရွယ်လေးက စပြီး သွေးမဆုံးခင်အချိန်အထိ ကလေးမွေးဖွားနိုင်တဲ့အရွယ် ပုပုရွရွ ၊ နုနုလှလှ အမျိုးသမီး မှန်သမျှ ပုံမမှန်သွေးဆင်းပြီဆိုတိုင်း ထိပ်ဆုံးကထားပြီး စဉ်းစားရမယ့်ကိစ္စဟာ ကိုယ်ဝန်အစောပိုင်းကာလ သွေးဆင်းတာဖြစ်နိုင်တယ် ဆိုတာပါပဲ ။

အဲဒီလောက်တောင် ကိုယ်ဝန်အစောပိုင်းကာလမှာ သွေးဆင်းတဲ့ ပြဿနာဟာ များလွန်းလှတယ် လို့ ပြောနိုင်ပါတယ်။

                     မိန်းမသားတွေ ရဲ့ဘ၀မှာ အပျိုပေါက်အရွယ်ကစပြီး သွေးဆုံးတဲ့ အချိန်ထိ လစဉ် ရာသီသွေးဆင်းကြရတယ် ။ ကိုယ်ဝန်ရှိလာပြီဆိုပြန်တော့လဲ ကိုယ်ဝန်အစောပိုင်းမှာရော၊ နောက်ပိုင်းမှာရော၊ မွေးနေတုန်းရော၊ မွေးပြီးတော့ရော သွေးတွေ သွန်တတ်ပြန်တယ်။ ကိုယ်ဝန်အစောပိုင်း ကာလတွေမှာ သွေးဆင်းရင် ထိပ်ဆုံးကထားပြီး စဉ်းစားရမယ့် ရောဂါ ၃ မျိုးရှိတယ် ။ အများဆုံးက သားပျက်သားလျှော ခြင်း  Abortion or Miscarriage ။ နောက်မမေ့သင့်တဲ့ ရောဂါ နှစ်ခုကတော့ သားဥပြွန်သန္ဓေ Ectopic pregnancy နဲ့ စပျစ်သီးသန္ဓေ Hydatidiform Mole တွေပဲ ဖြစ်တယ်။ ဒီ ၃ မျိုးထဲက ဘာများဖြစ်လေ မလဲဆိုတဲ့ စိတ်အတွေးနဲ့အဖြေရှာကြရတာပေါ့ ။

                     ဒီ ၃ မျိုးကြောင့်ပဲ သွေးဆင်းတာလား ၊တခြားအကြောင်းတွေရော မရှိတော့ဘူးလားလို့ မေးစရာရှိပြန်တယ်။ ဖြစ်နိုင်ခြေ ရှိတဲ့ ရောဂါတွေက သားအိမ်ခေါင်းထိပ်မှာ ကင်ဆာဖြစ်တာ ၊ အသားပို ဖြစ်တာ၊မွေးလမ်းကြောင်း ထဲမှာဒဏ်ရာရပြီး စုတ်ပြဲသွားတာ စသဖြင့်ပေါ့ ။ တစ်ခါတလေများ လိင်ဆက်ဆံရင်း မွေးလမ်းကြောင်းမှာ ထိခိုက်ဒဏ်ရာရပြိး သွေးသွန်တာတွေလည်း ရှိတတ်တယ်။

                     ဒီကိုယ်ဝန်ဆောင် အစောပိုင်းသွေးဆင်းရခြင်းတွေရဲ့ အဓိက အများဆုံးဖြစ်တတ်တဲ့ သားပျက်သားလျှောခြင်းအကြောင်း စပြီးဆွေးနွေးကြည့်ကြစို့ ။ သားပျက်သားလျှောတာမှာ အဓိက နှစ်မျိုး ခွဲခြားလို့ရတယ် ။ သူ့အလိုလို မတော်တဆ သားပျက်တာ Spontaneous Abortion နဲ့ ကိုယ်ဝန်ကို ဖျက်ချတာ Induced Abortion တို့ပါပဲ ။ Abortion ဆိုတာ ကလေးပျက်ကျတာ လို့ အားလုံးသိမ်းကျုံးပြီးခေါ်ကြပေမယ့်  ဒီနှစ်မျိုးဟာ လုံးဝမတူပါ ။ အင်္ဂလန် နိုင်ငံမှာဆိုရင် Abortion ဆိုတဲ့စကားကို မလိုချင်လို့ ဖျက်ချတဲ့ ကိစ္စတွေမှာပဲ သုံးတယ်။ မတော်တဆ သားပျက်ကျတာမျိုးမှာ Abortion ဆိုတဲ့စကားကိုသုံးရင် မိခင်ကို စော်ကားရာရောက်တယ်။ နဂိုကမှ သူအင်မတန် လိုချင်ချစ်မြတ်နိုးတဲ့ အူဝဲလေး ကြွေလွင့်သွားခဲ့လို့ ကြေကွဲဝမ်းနည်းနေချိန်မှာ ဒီအသုံးအနှူန်းဟာ သူ့ကို များစွာထိခိုက်ခံစားစေနိုင်ပါတယ်။ ဒါကြောင့် ရိုးရိုးကလေးပျက်တာကို Miscarriage လို့ပဲ ခေါ်ကြပါတော့တယ် ။

                   မိခင်ဘ၀ဆိုတာ အမျိုးသမီးတိုင်း အလွယ်တကူ ရနိုင်တဲ့ဘ၀မျိုး မဟုတ်ပါဘူး။ တကယ်တမ်းကျတော့ မိခင်ဆိုတာ သဘာဝ ကပေးအပ်တဲ့ ကံကောင်းခြင်းလက်ဆောင် ဖြစ်ပါတယ်။ အိမ်ထောင်ကျပြီးတော်တော် နဲ့ ကလေးမရနိုင်တဲ့ စုံတွဲတွေအများကြီး ။ မတော်တဆ ကိုယ်ဝန်ရသွားပြီ ဆိုရင်တောင် အောင်အောင်မြင်မြင် ကလေးမွေးနိုင်တာ ဘယ်လောက်များမှာလဲ ။ ကိုယ်ဝန်ဟာ အကြောင်းမျိုးစုံကြောင့် ပျက်သွားနိုင်တာကိုး ။ ကိုယ်ဝန်ဆောင် အားလုံးရဲ့ ၂၅ ကနေ ၃၀ ရာခိုင်နှူန်းလောက်အထိ မအောင်မြင်ဘဲ ပျက်ကျ သွားတတ်တယ်လို့ သုတေသနတွေက ဆိုပါတယ်။

ဘာကြောင့်များ အူဝဲလေးဟာ မိခင် ရဲ့သားအိမ်ထဲကနေ အစောကြီးလျှောကျ  ပျက်စီးသွားကြရတာပါလိမ့် ။

                  ကိုယ်ဝန်ပျက်ကျတတ်တဲ့ အကြောင်းတွေ က အများကြီးရယ်။ အဲဒီအကြောင်းတွေထဲကမှ အဖြစ်အများဆုံးအကြောင်းကတော့ အူဝဲလေးမှာ မျိုးရိုးဗီဇအားဖြင့် ပုံမမှန်တဲ့ရောဂါ  Chromosomal Defects ရှိနေလို့ပဲ ဖြစ်တယ်။ ဒီရောဂါတွေ ကြောင့် ကလေး ပျက်ကျတာဟာ စုစုပေါင်း ရဲ့ ထက်ဝက်မက ၅၀-၇၀ ရာခိုင်နှူန်းတောင်  ရှိတယ်လို့ ဆိုကြတယ် ။ ဒီလို မျိုးဗီဇပုံမမှန် တာဟာ မိခင် ရဲ့ အသက်အပေါ် အရမ်းမူတည်တယ်။ မိခင် အသက်ကြီးလေ ပုံမမှန်တဲ့ ကလေး ပိုမွေး တတ်လေ လို့တောင်   ယေဘုယျအားဖြင့် ပြောလို့ရတယ်။ အသက် ၄၀ အမျိုးသမီးကြီးတယောက်ဟာ အသက်၂၀ မိန်းကလေးတယောက်ထက် ၂ဆ ကလေးပျက်ဖို့ ပိုများတတ်တယ် ။ ကလေးမှာ ပုံမမှန်တဲ့ ချို့ယွင်းချက်တွေ ရှိနေရင် ဒုက္ခိတကလေးအဖြစ် ကမ္ဘာလောက ကြီးထဲ ရောက်လာတတ်တာဆိုတော့ ကိုယ်ဝန်အစောကြီးမှာကတည်းက ပျက်ကျသွားခြင်း အားဖြင့် သဘာဝတရားကြီး က အဆုံးအဖြတ်ပေးလိုက်တဲ့ သဘောလို့တောင် ပြောလို့ရမလားဘဲ ။

                   အသက်ကြီးလေ မျိုးဗီဇ ပုံမမှန်တဲ့ ကလေးတွေ ပိုပြီး မွေးတတ်လေ လို့ပြောနိုင်တာမို့ မိခင်လောင်းတွေ ကို အသက်ငယ်ရွယ်စဉ်မှာကတည်းက သားသား၊မီးမီးလေးတွေ ရယူဘို့ ကြိုးစားသင့်တဲ့အကြောင်း ၊အသက်သိပ်ကြီး မှ ကလေးမွေးတာဟာ အန္တရာယ်များတဲ့ အကြောင်း တိုက်ဆိုင်တိုင်းပြောပြလေ့ရှိတယ် ။

အကောင်းဆုံး နဲ့ အထင်ရှားဆုံး ဥပမာ ပြရရင် Down'sSyndrome ခေါ်တဲ့ ဥာဏ်ရည် နိမ့်တဲ့ ပုံမမှန်ကလေးတွေ ဟာ မိခင် အသက်ကြီးလေပိုပြီးမွေးတတ်လေပါပဲ ။

                    တခြား ကလေးပျက်ကျစေတဲ့ အကြောင်းတွေ ကို ဆက်ပြီး ကြည့်ကြဦးစို့နော် ။ ကလေးကြောင့် ဇြစ်တဲ့ တခြားအကြောင်းတွေက စပျစ်သီးသန္ဓေ နဲ့ ကလေး နဲ့ တွဲပြီး ဖြစ်တာမျိုးတွေ ၊ အမြွာပူးလေးတွေ နှစ်မြွာ၊ သုံးမြွာ၊လေးမြွာ အမြွာများလေ ပိုပြီးပျက်ကျဘို့ များလေ လို့ ပြောရမလား။ တခါတလေ ကလေးဆီ မိခင်က အစာအဟာရတွေပေးတဲ့ ချက်ကြိုး မှာ ထုံးနေတာ၊လိမ်နေတာ ၊ ပတ်နေတာ တွေကြောင့်လည်း ကလေးသေဆုံးသွားပြီး ပျက်ကျသွားတတ်တယ် ။ တစ်ခါတလေကျတော့ ကလေးမှာ မိခင်နဲ့ သွေးအုပ်စုချင်းတွေ (ဥပမာ Rh မြောက်သွေး အုပ်စု) မတူကြတဲ့အခါမှာ သွေးနီဥတွေ ပေါက်ကွဲပြီး ကလေးမှာ သွေးအားနည်းရောဂါဖြစ်တဲ့အခါကျရင်လည်း ပျက်ကျသွားတတ်တာတွေ ရှိတတ်တယ် ။ ဒါတွေကတော့ အူဝဲလေးမှာ ဖြစ်တတ်တဲ့ အကြောင်းတွေ။

                 မိခင်ကြောင့်လည်း ကလေးပျက်ကျစေတတ်တဲ့ အကြောင်းတွေ အများကြီး ရှိသေးတယ် ။ ကိုယ်ဝန်အစောပိုင်း ကာလတွေမှာ အကြောင်းတခုခုကြောင့် အဖျားတွေ အရမ်းကြီးပြီး ပြင်းပြင်းထန်ထန် နေမကောင်းဖြစ်မယ်ဆိုရင်လည်း ကလေးပျက်ကျတတ်တယ်။ ရောဂါ ပိုးမွှားတွေ ၀င်ရောက်တိုက်ခိုက်ခံရတဲ့ Infection တွေဟာလည်း ကလေးပျက်ကျစေတဲ့ တရားခံတွေပါ ။ TORCHS လို့ အတိုကောက် ခေါ်ကြတဲ့ ရောဂါတွေက ထိပ်ဆုံးကပေါ့ ။  Toxoplasmosis ကြောင် ကတဆင့် ကူးစက်တတ်တဲ့ ကပ်ပါးရောဂါတမျိုးကြောင့် ဖြစ်တဲ့ ရောဂါ ။ ဒါကြောင့် ကိုယ်ဝန်ရှိလာရင် ကြောင်တွေ နဲ့ လက်ပွန်းတတီး မနေရဘူး ။ ကြောင်ချေးကနေတဆင့် ကူးစက်တတ်တာကိုး ။ ဒီရောဂါ ရရင် ကလေးဟာ ပျက်ကျရင်ကျ၊ ပျက်မကျရင် ဆွံ့အ နားမကြား ၊မျက်လုံးကန်း၊ ဥာဏ်ရည်မမှီ ကလေးမွေးတတ်တယ်။ Rebella လို့ခေါ်တဲ့ ဂျိုက်သိုးရောဂါ အမျိုးသမီးတိုင်းဟာ ဒီရောဂါပိုး ၀င်ရောက်ရင် ဒီရောဂါပိုးဝင်ရောက်ရင်  ကလေး ပျက်ချင်ပျက် ၊မပျက်ရင်လည်း ဒုက္ခိတလေး မွေးတတ်လို့ အင်္ဂလန်လို တိုးတက်တဲ့နိုင်ငံတွေမှာ အမျိုးသမီးတိုင်း ဒီရောဂါ ကာကွယ်ဆေး ကို ငယ်ငယ်ကတည်းက ထိုးရတယ်။ ကိုယ်ဝန်ယူတော့မယ့် အမျိုးသမီးတိုင်းကို ဒီရောဂါ ကာကွယ်တဲ့ ဓါတ်တွေ ရှိမရှိ စစ်ဆေးတယ် ။ မရှိသေးရင် ကလေးမယူသေးဘဲ ကာကွယ်ဆေး အရင်ထိုးခိုင်းတယ်။ မြန်မာပြည်မှာတော့ ဒီရောဂါ ရဲ့ ကြောက်မက်ဖွယ်ကောင်းပုံ ၊ အန္တရာယ်တွေ နဲ့ ဘယ်လို ကာကွယ်ကြမယ်ဆိုတာ ကို လူသိနည်းနေကြသေးတယ်။ ဗိုင်းရပ်စ် ပိုး ရောဂါ Cytomomegalo Virus ၊ လိင်အင်္ဂါ မှာ ရေယုန်ပေါက်တာ  Herpes ၊ ဆစ်ဖလစ် ကာလသားရောဂါပိုး Syphillis တွေဟာလည်း ကလေးပျက်ကျစေတဲ့ တရားခံတွေ ဖြစ်တယ်။ မြန်မာပြည်မှာ အဖြစ်များတဲ့ Malaria  ငှက်ဖျားရောဂါ ဟာလဲ ကလေးပျက်ကျစေတဲ့ အကြောင်းတစ်ခု ။ တွိုက်ဖွိုက် လို့ခေါ်တဲ့ အူရောင်ငန်းဖျားရောဂါ စသဖြင့် မိခင်မှာဖြစ်တဲ့ ရောဂါ ပိုးမွှား ၀င်ရောက်ခြင်းတွေဟာ ကလေးပျက်စေတတ်တယ် ။

                  နောက်တစ်မျိုး ကတော့  မိခင်မှာ ဖြစ်တဲ့ ရောဂါတွေပါပဲ ။ ဟော်မုန်းတွေ နဲ့ ပတ်သက်တဲ့ ရောဂါတွေ ( Endocrine Disorders)၊ ဆီးချို သွေးချို ရောဂါ၊ သိုင်းရွိုက်ရောဂါ ၊ သားဥအိမ်မှာ အရည်အိတ်လေးတွေ အများကြီးတည်တဲ့ရောဂါ (PCOS-Poly Custic Ovarian Syndrome) တွေဟာလည်း ကလေးပျက်ကျစေတဲ့ တရားခံတွေပါပဲ ။ အချင်းဖြစ်ဖို့ အူဝဲလေး သားအိမ်မှာ မြဲမြဲမြံမြံ နေစေဖို့ အရေးကြီးတဲ့ ပရိုဂျက်စတိရုန်းဟော်မုန်းတွေ ချို့တဲ့ တဲ့အခါ မှာလည်း ကလေးပျက်ကျစေတတ်တယ် ။

                နောက်တစ်ခု ထူးဆန်းတာက စိတ် နဲ့ ပတ်သက်တာ။ စိတ်မှာ ရုတ်တရက် ပြင်းပြင်းထန်ထန် ထိခိုက်ခံစားရတာ ၊ စိုး၇ိမ်တကြီး နဲ့ ကြောက်တာ ၊ ဒေါသတွေ ၊သောကတွေ ၊စိတ်လှုပ်ရှား ထိခိုက်ခံစားမှူတွေဟာလည်း ကလေးပျက်ကျစေတတ်တဲ့ တရားခံပါပဲ ။ စိတ် နဲ့ ကိုယ်ဟာ အမြဲတွဲနေတတ်တာ မဟုတ်လား ။

                နောက်တရားခံကတော့ အူဝဲလေး နေရမယ့် သားအိမ်ရဲ့ ပြဿနာတွေပါပဲ ။ ပထမဆုံး မွေးရာပါ သားအိမ်ရဲ့ ပုံမမှန် ချို့ယွင်းချက်တွေ ဖြစ်တယ်။ သားအိမ်ကောင်းကောင်းမဖွံ့ဖြိုးတာ၊ သားအိမ်နှစ်ခု ဖြစ်နေတာ၊ သားအိမ်နံရံ မှာ အသားပိုတွေ ထွက်နေတာ စတဲ့ သားအိမ်ပြဿနာတွေမှာ သားအိမ်ထဲ ကလေးလေး လွတ်လွတ်လပ်လပ် ကြီးပြင်းလို့မရအောင် အနှောင့်အယှက်တွေ ပေးတတ်တယ်။ အဲဒီလိုပါပဲ၊ သားအိမ်ထဲမှာ အသားလုံးတွေဖြစ်တဲ့ ရောဂါ Fibroids တွေမှာလည်း နေရာလုကြတဲ့ သဘောမျိုးဖြစ်ပြီး ဒီအသားလုံးတွေကြောင့်  ကလေးဟာ ကြီးထွားဖို့နေရာမရှိတော့ဘဲ ပျက်ကျသွားရတာတွေ ရှိတတ်တယ်။ တစ်ခါတလေ ကျတော့ အကြောင်းတစ်ခုခုကြောင့် သားအိမ်ခြစ်ရတဲ့အခါမှာ သားအိမ်နံရံ ရဲ့ အတွင်း မြှေးတွေအားလုံးပါသွားအောင် အားရပါးရ အခြစ်လွန်သွားရင်လည်း သားအိမ်အတွင်းမြှေးဟာ ဖွံ့ဖြိုး ထူထဲမလာတော့ တာကြောင့် ရာသီလဲ ကောင်းကောင်းမလာတော့ဘူး ။ မတော်တဆ ကိုယ်ဝန်ရှိရင်တောင် ကလေးလေး ၀င်ရောက်ကြီးထွား ဖွံ့ဖြိုးရမယ့်  သားအိမ်အတွင်းမြှေး လုံလုံလောက်လောက်မရှိတာအို့ ပျက်ကျသွားဖို့ပဲများတယ်။ နောက်တစ်မျိုးဖြစ်တတ်တာရှိသေးတယ် ။ ဒါကတော့ သားအိမ်ခေါင်းအပေါက်မလုံတာ Cervical Incompletence ပဲဖြစ်တယ်။ သားအိမ်ခေါင်း အ၀ဟာ ပုံမှန်ဆိုရင် တံခါးချပ်ပိတ်သလို လုံးဝပိတ်နေရမယ်။ ဒါမှ သာ သားအိမ်ထဲက ကလေးလေးကို လုံခြုံမှူပေးနိုင်မှာ ဖြစ်တယ်။ နေ့စေ့ လစေ့ ဖြစ်ပြီး မွေးဖို့အချိန်ကျပြီ ဆိုတော့မှ သားအိမ်ခေါင်းအ၀လေးဟာ တဖြည်းဖြည်းပွင့်လာပြီး ကလေးလေးထွက်လာအောင် လုပ်ပေးတာ ၊ တကယ်လို့ ဒီသားအိမ်ခေါင်းအ၀လေးဟာ ပိတ်မနေဘဲ ဟစိဟစိနဲ့ နဂိုကတည်းက ပွင့်နေပြီ ဆိုရင် ကိုယ်ဝန်အစောပိုင်းမှာကတော့ ပြဿနာ မရှိသေးဘူး။ တဖြည်းဖြည်း ကိုယ်ဝန်က ၅လ ၊၆လ ကျော်လောက် ရလာပြီ ဆိုတဲ့အခါ ကြီးထွားလာတဲ့ သန္ဓေသားရဲ့ အလေးချိန် ကို ဒီအပေါက်လေးက တောင့်မခံနိုင်တော့ဘဲ သူ့အလိုလို ဗိုက်တောင် ကောင်းကောင်းမနာလိုက်ဘဲ အိတ်လိုက်လေး ထွက်ကျသွားပါလေရော။

               တစ်ခါတလေ ကျတော့လည်း ကိုယ်ဝန်လနုစဉ်မှာ မိခင်ကို ပေးလိုက်တဲ့ ဆေးတွေ ကြောင့်လည်း ကိုယ်ဝန်ပျက်ကျတတ်တယ်။ ဥပမာ- ငှက်ဖျားရောဂါမှာပေးလေ့ရှိတဲ့ Quinine, ကင်ဆာရောဂါတွေ ကုတဲ့နေရာမှာသုံးတဲ့ Cytotoxics သားအိမ်ကျုံ့စေတဲ့  Oxytocins ဆေးတွေဟာ ကိုယ်ဝန်ပျက်ကျစေတတ်တဲ့ ဆေးတွေ ဖြစ်တယ်။

               Chemical Agents လို့ခေါ်တဲ့ ဓာတုဗေဒ ပစ္စည်းတွေကြောင့်လည်း သားပျက်သားလျှော ဖြစ်စေတတ်တယ်။ မေ့ဆေးမှာ သုံးတဲ့ ဓာတ်ငွေ့တွေ  (Anaethetic Gases) ၊ ဆေးရွက်ကြီး ( Tobacco) ၊ အာဆင်းနစ် ခေါ် စိန် (Arsenic) ၊ Benzene Formaldehyde ၊ ပိုးသတ်ဆေးတွေ (Pesticides)၊ Lead ၊Mercury ၊ Cadmium စတဲ့ ပစ္စည်းတွေ ဟာ ဥပမာ တွေပဲဖြစ်တယ်။ ဒါတွေကြောင့် ကလေးပျက်ကျတာကတော့ ရှားပါတယ်။

                နောက် ကလေးပျက်ကျစေတတ်တဲ့ရောဂါကတော့ ကိုယ်ခံစွမ်းအားနဲ့ ပတ်သက်တဲ့ ပြဿနာတွေ ( Immunological Disorders) ပဲဖြစ်တယ် ။  Antiphospholipid Syndrome, Thrombophilia အစ ရှိတဲ့ ရောဂါတွေပေါ့ ။ အထူးသဖြင့် ကိုယ်ဝန်လနုနု မှာ ထပ်ခါ ထပ်ခါ ကိုယ်ဝန်ပျက်ကျတာ (Recurrent Misdarriage) တွေဟာ ဒီရောဂါတွေ ကြောင့် ဖြစ်တတ်တယ် ။ ဒါတွေကတော့ သားပျက်သားလျှော ဖြစ်စေတတ်တဲ့ အကြောင်းရင်းတွေပဲ ဖြစ်တယ် ။ တကယ်တမ်း မိခင်တယောက် ကလေးပျက်ကျသွားပြီ ဆိုရင် ဘာကြောင့် သားပျက်တယ်ဆိုတဲ့ အကြောင်းကို တိတိကျကျ ရှာဖွေ ဖော်ထုတ်ဖို့ဆိုတာ မလွယ်ကူတတ်ကြဘူး ။ ဘာကြောင့်မှန်း မသိဘဲ သူ့အလိုလို ကလေးပျက်တယ် လို့ ကောက်ချက်ချရမယ့် လူနာတွေ က ပိုများလိမ့်မယ် ။   

3 comments:

  1. Many Thanks Mae Than...
    Let me share on my FB wall...

    ReplyDelete
  2. ပညာပေးလေးကို စိတ်ရှည်စွာနဲ့ ပြန်လည်မျှဝေပေးထားတာပါလား သန္တာရေ။
    အမျိုးသမီးတိုင်းအတွက် ဖတ်သင့်တဲ့ ပို့စ်လေးတစ်ပုဒ်ပဲ။ ကိုယ်ဝန်ပျက်ကျတာရဲ့
    အဓိကဖြစ်နိုင်ဖွယ်ရာ အကြောင်းရင်းတွေကို ကိုယ်ဝန်မဆောင်ခင်ထဲကသိသင့်ကြတယ်။
    စိတ်ဓာတ်အစဉ်ကြည်လင်အေးမြပါစေကွယ်။

    မေတ္တာဖြင့်
    အန်တီတင့်

    ReplyDelete
  3. ကျေးဇူးတင်ပါတယ်အခုလိုအကျိုးရှိတဲ့စာပေဗဟုသုတ တွေများများတငပေးပါနော်။

    ReplyDelete