လူ့စည်း ဘီလူးစည်း

ဘယ်အရာမှာမဆို သူ့စည်း ကိုယ့်စည်း ရှိပါတယ် ။ တခုခု ကိုပြောမယ်ဆိုရင် ကိုယ့်စည်း ကိုယ့်တာ ဆိုတာလည်း ဘယ်လောက်လုံသလဲ လို့ ပြန်ကြည့်ရပါဦးမယ် ။ 

 

ကျမ စင်္ကာပူမှာနေတာ ဆယ်နှစ် ပြည့်တော့မယ် ။ မြန်မာ ကို အကြိမ်ကြိမ် ပြန်ခဲ့ပါတယ် ။
အ၀င် သို့ အထွက် ကို တခါမှ ဘယ်သူ့ကိုမှ ဘာမှ မပေးဖူးပါဘူး ။ အခု အစိုးရ လက်ထက်မှာသာမက အရင် အစိုးရ လက်ထက်မှာလဲ မပေးဖူးပါဘူး ။
ဒီလို မပေးရဖို့အတွက်လဲ လိုက်နာရမယ့် စည်းကမ်းများကို နားလည်အောင် အရင် လုပ်ရပါသေးတယ် ။ မသိတာ နားမလည်တာကို မေးရ မြန်းရ ၊ လေဆိပ်ကို အချိန်နည်းနည်းပေးသွားပြီး ဖတ်ရမှတ်ရတာလည်း ရှိပါတယ် ။
ဘာကို လိုက်နာရမယ်မှန်းမသိပါဘဲနဲ့ ဘယ်လို လိုက်နာရ ပါမလဲ ။ ကိုယ်က ဒီစည်းကမ်း ကို လိုက်နာမှတော့ ဘာအတွက် ပေးစရာလိုပါသေးလဲ ။ တောင်းတာက သူတို့အလုပ်ဆို ပေးတာက ကိုယ့်အလုပ်ပါ ။ တကယ်တော့ လာဘ် ဆိုတာ ယူတဲ့သူတင်မဟုတ် ပေးတဲ့ သူမှာပါ အပြစ်ရှိပါတယ် ။

 

 

၁) စင်္ကာပူ၊ မလေးရှား ၊ ထိုင်း၊ အင်ဒိုနီးရှား ၊ ဟောင်ကောင် တို့ကို ရောက်ဖူးပါတယ် ။ လာဘ်စားတာ မစားတာက နောက်မှပါ ၊ ဘယ် အင်မီဂရေးရှင်း မှာမှ ဓါတ်ပုံရိုက်ခွင့်မရှိပါ ။ မယုံရင် ဓါတ်ပုံရိုက်ကြည့်လိုက်ပါ ။ ဓါတ်ပုံ ရိုက်ခြင်းရဲ့ နောက်ဆက်တွဲ ဘာတွေ ကြုံတွေ့ရမယ်ဆိုတာ သိပါလိမ့်မယ် ။ ဒီလို immigration officer ကို ရိုက်ဖို့ ဝေးလို့ အဲဒီ ၀န်းအတွင်းတောင် ရိုက်ခွင့်မရှိပါဘူး ။ ဒီလို ငွေနှစ်သောင်းနဲ့တော့ ဒီအော်ဖစ်ဆာတွေက သူတို့ အလုပ်ကိုထိခိုက်အောင် ဓါတ်ပုံရိုက်ခွင့်ပြုမှာမဟုတ်ပါဘူး ။ ခိုးရိုက်တာဆိုလဲ ဒါဟာ အပြစ်တစ်ခုကို ကျူးလွန်ခဲ့တာပဲဆိုတာ သိစေချင်ပါတယ် ။

 

 

၂) စင်္ကာပူကို SPass အဆင့်နဲ့ လာမယ့်သူတစ်ယောက်ဟာ အလုပ်သမားစေလွှတ်တာကို ပိတ်ထားတယ် ဆိုတဲ့ စကားကို တကယ်လက်ခံယုံကြည်တာလား ၊ ပြီးပြီးရော ဟုတ်ဟုတ် မဟုတ်ဟုတ် ငါ ဒီအပေါက်က ထွက်ရပြီးရော လို့များ တွေးပြီး ပေးခဲ့လေသလား ၊ ဒီလို အလွယ်ပြီးအောင် လုပ်တတ်ရင် စင်္ကာပူမှာ ခက်ခဲတဲ့အချိန် ကို ကျေ်ာဖြတ်ရ တွေ့ရပါဦးမယ် ။ ကံကောင်းပါစေ ။

လာဘ်ပေးသူ ရှိနေသမျှ လာဘ်ယူသူလည်း ရှိနေပါဦးမယ် ။ လာဘ်ယူသူများ မရှိအောင် လာဘ်ပေးသူများက အရင်ဆုံး စည်းကမ်းနားလည်အောင်လုပ် လိုက်နာ ပြီး ကိုယ့်စိတ်ကိုယ်အရင် သည်းခံရပါမယ် ။. ကိုယ့်ကိစ္စတွေ မြန်ချင်ရင် ကိုယ့်ဘာသာ ကြိုတင် ပြင်ဆင်ပါ ။ ကိုယ်တိုင်လည်း အပြစ်တစ်ခုကို ကျူးလွန်ပြီး သူများ အပြစ်ပြောတဲ့ သူတွေဟာ မရှက်တတ်လို့ပါ ။

နောက်ဆုံးတော့ လစာ နဲ့ ကုန်ဈေးနှုန်းမမျှရင်လည်း ဒီလို လာဘ်ဆိုမယူမဖြစ် ယူဖို့ ဖြစ်နေဦးမှာပါပဲ ။ ဒါကတော့ အစိုးရ က ကိုင်တွယ်ရမယ့် အပိုင်းလည်း ဖြစ်ပါတယ် ။

....................................................................................................

ရေးချင်တာတွေ အများကြီး ရှိပါသေးတယ် ။

ကိစ္စ တစ်ခုခုတွေ့လို့ လူအများ ၀ိုင်းပြောနေပြီဆိုရင် တခြားတစ်ဘက်ကနေ ရှူထောင့်တစ်ခုနဲ့ တွေးကြည့်ပြီး ရေးပါဦးမယ်...........................။

သူ့အကြောင်း၊ ကိုယ့်အကြောင်း အချစ်တို့အကြောင်း ( ၄ )

ဖေ့ဘုတ်မှာ ဆယ်လီ တစ်ယောက် က သူမရဲ့ အိမ်ထောင်ရေးအကြောင်း ဖွင့်ဟပြောတာကို နားထောင်ရင်း နဲ့

မိရိုးဖလာ ဘာသာရေးနဲ့ ပတ်သက်ပြီး အတွေးပွားမိပါတယ် ။

 နောက် လွန်ခဲ့တဲ့ လအနည်းငယ်က ဟေမာ မေးခဲ့တဲ့ မေးခွန်းကို ပြန်ပြီး သတိရမိပါတယ် ။

ဟေမာလေး မေးတဲ့ မေးခွန်းက
" မေမေ ဘုရားက ပြောတာတွေဟာ Very strict မဟုတ်ဘူးလား" တဲ့ ။

သူ အဲလို မေးတော့ လန့်သွားပါတယ် ။
"ဘာဖြစ်လို့လဲ သမီးရဲ့ " ဆိုတော့
ဘုရားက အရက်မသောက်ရဘူး လို့ ပြောပါတယ် ။
ဒါပေမယ့် သောက်တဲ့သူတွေ အများကြီး ရှိတယ် ၊ ဘာဖြစ်လို့ မသောက်ရဘူး လို့ ပြောပြီးတော့ ဘာဖြစ်လို့ သောက်တဲ့သူတွေရှိနေတာလဲ လို့ ထပ်မေးပါတယ် ။


အရက်သောက်တာဟာ မကောင်းဘူး ဟုတ်တယ် ။ အရက်သောက်ရင် ကောင်းတာတွေကို လုပ်ဖို့ မေ့သွားတတ်တယ် ။ တကယ်လို့သာ အများကြီးသောက်မိရင် စိတ်တိုလာတတ်တယ်၊ စိတ်တိုလာရင် သူများကို ရိုက်မိတာတွေ ဖြစ်မယ် စကားတွေအကျယ်ကြီး ပြောမယ် ရန်ဖြစ်တာတွေ ဖြစ်မယ်။ ရန်ဖြစ်တာဟာ စိတ်တိုတာဟာ မကောင်းတာ လုပ်တာမို့ မကောင်းတာ မလုပ်အောင်လို့ ဘုရားက မသောက်ရဘူး လို့ ပြောတာပါ လို့ ပြန်ဖြေရပါတယ် ။

ဟေမာက ထပ်မေးပါတယ် ။
" မေမေ၊ မေမေ က ဖေဖေ့ကို မချစ်တော့ဘူးလားဟင်"  တဲ့ ။
"ဘာဖြစ်လို့လဲ သမီးရဲ့ " ဆိုတော့
"မေမေက ဟေမာ့ကို ချစ်တော့ ဟေမာ လုပ်တာမှားရင် မကောင်းတာလုပ်ရင် မလုပ်ရဘူးဆိုပြီးတော့ တားတယ်လေ ။ ဖေဖေ အရက်သောက်တာကို မေမေ မတား တာဟာ ဖေဖေ့ကို မချစ်လို့ ပေါ့ "တဲ့ ။
ဒါနဲ့ ဟေမာ့ကို သေချာပြန်ပြောရတယ် ။
"ဟေမာ့ ဖေဖေ ကို မေမေက ချစ်ပါတယ် " လို့
( မချစ်ဘူးလို့တော့ တခွန်းမှ ကိုမပြောတာနော် ဒီမေမေက :D သူ့အဖေ ကိုလဲ တော် နောက်ထပ်ဟေမာ့ ရှေ့မှာမသောက်နဲ့ လို့ ကျိတ် မှာရတယ် )
"ဒါပေမယ့် ဖေဖေ က လူကြီးဖြစ်နေပြီ ၊ ကောင်းတယ် မကောင်းဘူးဆိုတာ သူ့ဘာသာသူသိနေပြီ၊ သိနေရဲ့သားနဲ့ လုပ်တယ် မလုပ်ဘူးဆိုတာ သူ့သဘောပဲ ၊ တကယ်လို့ မှားတာဆိုလဲ မှားလို့ဖြစ်သွားတဲ့ဟာကို သူ့ဘာသာ ခံနိုင်လို့ပေါ့ ဟေမာကတော့ ငယ်သေးတဲ့ ကလေးလေးမို့ အများကြီးမသိသေးလို့ မေမေက ပြောရတာ သမီး ကြီးလာလို့ သမီးဘာသာသိတဲ့ အချိန်ကျရင်လဲ သမီးကို မေမေက ဒီလို လုပ်ရမယ် မလုပ်ရဘူးလို့ မပြောတော့ဘူး နော်" လို့ ပြန်ပြောရတယ် ။

ကျမ ငယ်တုန်းက အသက်ခြောက်နှစ်မှာ ငါးပါးသီလကို အလွတ်ရသလား ဆိုတာကို သေချာမမှတ်မိဘူး ။
ဟေမာကတော့ တနင်္ဂနွေတွေမှာ ဘုန်းကြီးကျောင်း ကို ပို့ပြီး မြန်မာစာ သင်ခိုင်းတော့ ဓါတ်တော်တိုက် တောင်ကြီးဆရာတော် ဖွင့်တဲ့ BMCA မှာက ဘာသာရေးကိုပါသင်ပေးတော့ သူ ငါးပါးသီလကို အဓိပ္ပါယ်နဲ့ပါ သိနေတယ် ။ သိပြီးတော့ သူ စဉ်းစားတယ်နဲ့ တူတယ် ဒါ့ကြောင့် မေးခွန်း ထွက်လာတာ ။

ကျမ ကတော့ အသက်လေးဆယ်ရှိပေမယ့် အခုထိ မိရိုးဖလာ အဆင့် ၊ မိဘက ဒီဘာသာကို ကိုးကွယ်တယ် ၊ ကိုယ်လဲ ကောင်းတယ်လို့ ယုံကြည်လက်ခံပြီး ကိုးကွယ် တယ် ဆိုတာပဲရှိတာ ။ တရားတော်တွေကို သေချာ ယုံကြည်နှစ်ခြိုက်ပြီး အဲဒီအတိုင်း နှလုံးသွင်းကျင့်ကြံ တယ် ဆိုတဲ့ အဆင့်ကို မရောက်သေးဘူး ။
ဟေမာ့ ကိုတော့ ဘာသာတရားရဲ့ အနှစ်သာရ ကို သေချာ နားလည်ပြီး သူကိုယ်တိုင် ယုံကြည်ပြီးမှ သာ ရွေးချယ်စေချင်တာ ။

ဗုဒ္ဓဘာသာ ကို ဟေမာ ရွေးချယ်စေချင်တယ်ဆိုရင် ဘာသာ ရဲ့ အနှစ်သာရကို ဟေမာနဲ့ ပိုပြီးနီးစပ်ရအောင် ၊ ဟေမာ သေချာနားလည် ယုံကြည်လက်ခံအောင် ပြောပြပေးနိုင်ဖို့ ကျမကိုယ်တိုင် အရင် ကြိုးစားရဦးမှာပါ ။    ။